250 унікальных турыстычных маршрутаў по маёй Беларусі. Кніга 7

Перад чытачом вынік шматгадовых вандраванняў аўтара па абшарах нашай краіны, яго працы з даследчымі і архіўнымі матэрыяламі. У выніку з’явіўся аўтарскі праект для падарожнікаў, які змяшчае каля 10 тысяч архітэктурных і прыродных славутасцяў Беларусі.

Кожны з 252 турыстычных маршрутаў мае дзесяць пунктаў, якія максімальна набліжаны адзін да аднаго з мэтай, каб у падарожнікаў была магчымасць праехаць і паглядзець маршрут за адзін дзень. А калі будзе час, то захапіць цікавыя аб’екты і суседняга маршруту. Такая колькасць пунктаў аднаго падарожжа дазваляе вандроўніку рабіць самастойны выбар, што глядзець і ў якой паслядоўнасці, кіруючыся зручным для яго напрамкам. 

У 21 кнізе гэтага праекта сабраныя амаль усе помнікі ахітэктурнай спадчыны, пабудаваныя да Другой сусветнай. Ёсць інфармацыя і здымкі помнікаў, якія разбураны зусім нядаўна. Гэта як дань памяці ім і напамін, што нашую нацыянальную спадчыну трэба берагчы і захоўваць усім грамадствам. 

Запрашаю і далей наведаць цікавыя гістарычныя і прыродныя мясціны нашай краіны. 

У сёмай кнізе, па Гродзенскай вобласці, прапаную наступныя турыстычныя маршруты: "Ашмяны", "Рэпля" і "Шчучын". У Гомельскай вобласці нас чакае турыстычны маршрут "Чачэрск". Два турыстычныя маршруты прапануе Мінская вобласць – гэта "Новы Свержань" і "Мядзел". На Віцебшчыне павандруем па маршрутах "Белая Царква" і "Смальяны". Два маршруты будуць у Брэсцкай вобласці: "Лунінец" і "Савейкі". 

Як заўсёды, да вашай увагі два тэматычныя маршруты: пра знакамітага італьянскага скульптара Карла Спампані і пра вялізныя камяні-валуны "Крэўскія абаронцы". У канцы – аўтарская легенда. 

Жадаем вам прыемных і захапляльных уражанняў ад гэтых вандровак!