Беларуская мова. 1 клас. Рабочы сшытак

Дапаможнік для ўстаноў агульнай сярэдняй адукацыі з рускай мовай навучання

Рабочы сшытак утрымлівае распрацаваныя да кожных заняткаў заданні, якія тэматычна і лексічна цесна звязаны са зместам канкрэтнага ўрока і адпавядаюць праграмным патрабаванням па вучэбным прадмеце "Беларуская мова". Прапанаваныя практыкаванні ўмоўна можна падзяліць на дзве групы, першая з якіх накіравана на развіццё ў першакласнікаў артыкуляцыйнага апарату, адпрацоўку правільнага вымаўлення спецыфічных гукаў беларускай мовы – [г], [ў], [дж], [ч], [р], [дз'], [ц'], спалучэння [шч]. Невялікія графічныя заданні, што прапануюцца на старонках сшытка, дазволяць пазнаёміць дзяцей з напісаннем некаторых літар беларускага алфавіта, ужываннем знака апострафа.

Другая група практыкаванняў утрымлівае лексічны і ілюстрацыйны матэрыял для замацавання вывучаемай на ўроку тэмы, фарміравання ўмення чытаць па-беларуску склады, словы, сказы, а таксама праверкі ўзроўню разумення вучнямі ўспрынятага на слых твора (казкі ці апавядання, прачытанага настаўнікам). Дадзеныя для завучвання напрыканцы кожнага ўрока вершаваныя радкі садзейнічаюць развіццю ў першакласнікаў маўленчага слыху, памяці, пашырэнню слоўнікавага запасу.

Выданне дапаможа настаўніку арганізаваць на ўроку розныя віды дзейнасці, якія будуць садзейнічаць выпрацоўцы ў дзяцей цікавасці да вывучэння роднай мовы.