Сапраўднае імя — Іван Фёдараў.
Нарадзіўся ў горадзе Лібаве, які зараз завецца Ліепая, у сям'і сталяра. Быў адлічаны на апошнім курсе семінарыі за вольнадумства. Працаваў настаўнікам, прыняў удзел у нелегальным з'ездзе, пасля чаго ўлады забаранілі яму выкладаць.
(1883–1971)
Сапраўднае імя — Іван Фёдараў.
Нарадзіўся ў горадзе Лібаве, які зараз завецца Ліепая, у сям'і сталяра. Быў адлічаны на апошнім курсе семінарыі за вольнадумства. Працаваў настаўнікам, прыняў удзел у нелегальным з'ездзе, пасля чаго ўлады забаранілі яму выкладаць. Толькі праз некалькі гадоў Янка Маўр змог вярнуцца да любімай справы.
Дэбютаваў як фельетаніст у газеце «Савецкая Беларусь» і часопісе «Бегемот». Адбылося гэта ў 1923 годзе і адкрыла перад маладым пісьменнікам шырокія літаратурныя перспектывы.
Першай надрукаванай на беларускай мове аповесцю стаў твор «Чалавек ідзе!..». Поспех быў велізарным! Юныя чытачы прасілі напісаць працяг. І потым кожны новы твор Янкі Маўра карыстаўся нязменнай папулярнасцю. Пісьменнік добра ведаў дзіцячую псіхалогію, заўсёды размаўляў з дзецьмі на роўных і казаў пра іх: «Хоць малыя, а чалавекi».
Апавяданні «Слёзы Тубі», «Незвычайная прынада», «Лаццароні», аповесці «У краіне райскай птушкі», «Сын вады», першы ў беларускай літаратуры прыгодніцкі раман «Амок» знаёмілі чытачоў з рознымі экзатычнымі краінамі. Маўр шмат ведаў аб гісторыі і геаграфіі, выкарыстоўваў у творчасці мемуары вучоных, падарожнікаў. Таму яго кнігі вельмі дакладныя і здзіўляюць цікавымі звесткамі нават вопытных вандроўнікаў.
На сваёй дачы пад Мінскам Янка Маўр збудаваў будан-кабінет з лазы. Стол у ім стаяў на мастках над Свіслаччу, таму можна было пісаць прыгодніцкія кнігі, звесіўшы ногі ў ваду і ўяўляючы сябе на беразе акіяна.
Велізарную вядомасць атрымалі аповесці «Палескія рабінзоны» і «ТВТ» пра звычайных школьнікаў. У 1934 годзе выйшаў фільм «Палескія рабінзоны», сцэнарыстам якога стаў Янка Маўр. Аснову фантастычнага жанру ў айчынный літаратуры заклалі творы «Вандраванне па Зорку», «Аповесць будучых дзён» і «Фантамабіль прафесара Цылякоўскага».
У творчай скарбонцы аўтара ёсць п'есы «Памылка», «Дом на ўскраіне», «Балбатун», пераклады на беларускую мову твораў вядомых рускіх пісьменнікаў — Антона Чэхава, Міхаіла Прышвіна, Зміцера Маміна-Сібірака, а таксама замежных — Рэдзьярда Кіплінга, Марка Твэна, Жуля Верна і інш.
