Рыцар Янка і каралеўна Мілана. Таямнічае каралеўства

От OZ.by

Дзень добры шаноўныя сябры! Вельмі рады прадставіць Вам сваю кнігу, асабліва на платформе OZ.by, бо гэта значна палягчае сувязь з чытачом.

Нашым дзецям добра знаёмыя казачныя і міфічныя героі многіх народаў. Але і наш фальклор не менш багаты. Таму і вырашыў напісаць гэтую кнігу, каб нашы дзеці ведалі сваю культуру і ганарыліся ёй, выхоўваліся на сваіх паданнях і легендах. Дадзеная кніга напісаная менавіта на падставе беларускага фальклору, а персанажы ў ёй – героі і міфічныя істоты з беларускіх паданняў: волат Вярнігара, Цмок, вужалкі, гарцукі і злыдні, ваўкалакі, лясун, багнік Кадук…

Аповесць напісаная ў жанры прыгодніцкага фэнтэзі. А галоўныя яе героі – такія ж самыя юнакі, для якіх гэтая кніга і прымеркаваная.
Усе мы і ў юначым і дзіцячым узросце адчувалі сябе дарослымі і хацелі, каб з намі лічыліся. Усе прагнулі прыгод і не жадалі сядзець на месцы. Так і героі гэтай кнігі, юныя брат і сястра, адпраўляюцца ў вандраванне па невядомым свеце, трапляючы ў яго праз старажытнае люстэрка ў дзедавай каморы, якое спалучае наш свет з таямнічым залюстрэччам, каралеўствам Сварга, якое нагадвае часы беларускага Сярэднявечча. Там ім належыць вырашаць задачы, якія не пад сілу нават многім дарослым. Але іх адказнасць, рашучасць і вера ў надзейнае плячо новых сяброў дазваляюць і ворагаў перамагаць і ўратаваць цэлае каралеўства ад злога тырана, які каварствам захапіў трон і пры дапамозе вядзьмарства і  ненавісных ваўкалакаў утрымлівае яго.

На старонках кнігі дзеці не толькі бліжэй пазнаёмяцца з героямі беларускіх паданняў, але і зразумеюць, што трэба трымаць сваё слова, верыць у свае сілы і, спадзяюся, навучацца быць больш самастойнымі, і не будуць баяцца браць на сабе адказнасць ды быць лідарамі. І пры гэтым у кнізе надзяляецца ўвага любові да бацькоў і да зямлі, якую трэба берагчы, а як што – то і бараніць.
І галоўнае – гэта толькі пачатак гісторыі, якая будзе мець і працяг. Таму вельмі цікава і мне паслухаць пажаданні чытачоў – што спадабалася ці не, і што яны хацелі б пабачыць у наступных гісторыях.

З павагай, аўтар кнігі "Рыцар Янка і каралеўна Мілана. Таямнічае каралеўства" Алег Грушэцкі.