От OZ.by
Добры дзень, шаноўныя чытачы!
Імя нашага таленавітага сучасніка Васіля Зуёнка, аўтара кнігі "Паўстанак з літарай «Л»", напэўна, знаёма Вам са школьнай праграмы. Гэта адзін з найбольш вопытных творцаў, прадстаўнік унікальнага літаратурнага пакалення – побач з Рыгорам Барадуліным, Генадзем Бураўкіным, Нілам Гілевічам, Янкам Сіпаковым, Міхасём Стральцовым…
Нават у сталым узросце Васіль Васільевіч не страціў дзіцячага ўмення здзіўляцца сам і здзіўляць іншых. Гэтым разам майстра паэтычнага радка выступіў у нетрадыцыйнай для яго ролі празаіка – у аўтарскім жанры "элегіі жыцця".
Кніга адкрываецца прадмовай Анатоля Кудраўца, падрыхтаванай яшчэ ў 1999 годзе спецыяльна для першай часопіснай публікацыі празаічных элегій. Яго ўзрушанае, лірычна-прачулае мастацкае прадстаўленне вельмі дакладна патрапліла ў агульную настраёвую гаму твораў: "Па першасным значэнні слова "элегія" мае на ўвазе нешта жалобнае, сумнае, мройнае. Вельмі блізкае беларускім жніўным песням. Трошкі музыкі, трошкі слоў, трошкі слёз і трошкі надзеі"...
"Трошкі музыкі, трошкі слоў, трошкі слёз і трошкі надзеі" знойдзем ва ўсіх дванаццаці празаічных элегіях. Сярод іх – светлыя настальгічныя ўспаміны пра гады юнацтва, спробы зразумець ранімую дзіцячую душу, асэнсаваць турботы дарослага, але безабароннага чалавека ў няпростым свеце, раскрыць індывідуальнасць і разам з тым паказаць нацыянальны характар…
Калі Вы любіце якасную беларускую літаратуру, напісанаю сакавітаю моваю, здольную выклікаць эмацыянальны рэзананс, падарыць эстэтычна-інтэлектуальную асалоду, то гэта кніга для Вас.
Калі Вы неафіт беларускага слова, толькі ўваходзіце ў неабдымны космас айчыннай літаратуры, то варта пачынаць з найлепшых узораў. А яны якраз і прадстаўлены ў гэтым выданні.
Прыемных Вам адкрыццяў!
З павагай, укладальнік кнігі Наталля Заяц
